إزاي تقدر تتكلم بثقة

لما بتقدم واحد صاحبك مثلاً لشخص بيشوفه لأول مرة .. بتحاول تكون علاقة بين الاتنين من خلال اهتمام مشترك بين الشخصين , و علشان تقدر تقيم علاقة مع مستمعك حاول إنك تستغل الثواني الأولى .. دايماً ابتسم و انت بتكلم اللي قصادك .. ابتسم دايماً و أكيد اللي قدامك هيرد الابتسامه قبل ما تتكلم كلمة واحده.

اجذب انتباه المستمعين

علشان تقدر تجذب انتباه اللي بيسمع لك في أربع حاجات بتسبب كده :

1-الترحيب و الابتسامه

2-تقديم الموضوع

3-إلقاء الحديث

4-النهاية و الوصول لهدف الحديث

أي كلام بصرف النظر عن إنه طويل أو كلام قصير لازم يكون ليه مقدمة , و المقدمة هي أول فقرة في الكلام و هدفها جذب انتباه اللي بيسمعك لأنها تعتبر المرشد للموضوع اللي هتتكلم فيه , و كمان بتثير اهتمامه.و آخر جملة بتتكلم عنها في المقدمة بتكون المفتاح اللي بتفتح بيه الموضوع و هدفها إلقاء الحديث و إعداد المستمع إنه يكمل الموضوع.في تقريباً 8 أنواع من المقدمات الفعالة و اللي تقدر تختار من بينهم النوع المناسب ليك :

1-ممكن مثلاً إنك بدل ما تتكلم بشكل عام عن الموضوع تضيّق نطاق المقدمة و تتكلم بشكل أخص و ده بيطلق عليه “تضييق الموضوع”

2-لو انت مش معروف للي بيسمعك فبالتالي لازم يقدمك حد معروف ليهم و اللي هيتكلم عن قدراتك على الكلام في الموضوع الفلاني , و لو الكلام ده منفعش علشان تكسب الثقة و الاحترام ليك , فلازم انك تأسس لنفسك مصداقية للي بيسمعك و لو ذكاءك و عملك و خبرتك تخليك تظهر بشكل الخبير متترددش أبداً إنك تظهر ده.

3-استخدم المقارنة في كلامك لأنك محتاج توضح تفوق حاجه على حاجه تانيه و لا يمكن تمدح في كل حاجه في موضوعك يعني مثلاً ممكن تقارن بين عربية تويوتا و عربية بي ام دبليو

4-خصص موضوعك و اتكلم في التفاصيل الخاصة بالموضوع , و غالباً الأرقام و الإحصائيات بتكون ليها إقناع بالنسبة للمستمع اللي قصادك

5-لو مش شايف في نفسك الخبره في الموضوع اللي بتتكلم فيه , حاول تستشهد بأشخاص ليهم الخبره في الموضوع ده و لازم تتأكد ان الخبير اللي استشهدت بيه خبير فعلاً , يعني مثلاً لو استشهدت بعمرو دياب و انت بتتكلم في موضوع الندرة النسبية في الاقتصاد , فده طبعاً مش هيكون مقنع للي بتكلمه زي لو اسشهدت باقتصادي خبير متخصص في المجال ده.

6-استخدام حكاية أو قصة من الحياة هيفيدك كتير , ممكن تجذب انتباه المستمع بالحكاية دي ممكن تكون قصة مضحكة و ممكن تكون حزينة بس المهم انها تجذب المستمع ليك .. قصص مثلاً عن سلوكيات غريبة أو مثيرة أو مخيفة

7-ساعات ممكن تتكلم نص ساعة كلام دش و محدش فاهم حاجه اعرف انك لازم توضح كلامك بمثال تقول مثلاً ….. , على سبيل المثال ……..

8-لازم تكون متأكد ان المستمع فاهم انت بتقول إيه , ساعات تلاقي  واحد بيتكلم و بيقول مصطلحات غريبة و قديمة .. اعرف إن العصر اتغير عن الماضي و المصطلحات اختلفت و كترت علشان كده لازم تستخدم المصطلحات الجديده و المفهومة .

أهمية المقدمات

لو قعدت تكتب في مقدمة ساعتين و الباقي نص ساعة مش مشكلة , لأنك لازم تعرف ان مقدمتك دي مهمة جداً لأنك لو نفذتها صح هتكون كسبت نص المعركة بينك و بين اللي بيسمعك , لأن الكلام ده يعتبر كمعركة لأنك بتحارب علشان تجذب انتباه اللي بيسمعوك .

ازاي تخرج من الموضوع

أحسن حاجه تختم بيها كلامك إنك تلخص كل اللي قلته علشان متسيبش اللي قدامك تايه و مش فاهم حاجة .. لازم يخرج المستمع من كلامك و هو راضي إنه قعد يسمعك و فهم انت عايز إيه من اللي قلته.