تنمية الثقة بالنفس

Posted by : Stylish

اتكلمنا قبل كده عن انعدام الثقة بالنفس و كمان عن ازاي نقدر نتكلم بثقة و شوية مواضيع تانيه ..و لازم قبل ما نتكلم تاني نقول يعني إيه ثقة بالنفس .. الثقة بالنفس كتعريف علمي : الشعور بالكفاية و قبول الآخرين و الاتزان الإنفعالي و الإيمان بالقدرات النفسية ..و يقابل الشعور ده مجموعة تانيه من الخواص زي التردد و الخجل و عدم القدرة على اتخاذ قرار و الإحساس بالنقص .

في خمسة أسئلة لازم تسألهم لنفسك :

 هل بتشعر إنك واثق في نفسك لما بتتكلم مع ناس قريبين ليك زي أهلك و أصدقاءك ؟ •

 هل بتكسب ثقة و احترام اللي ليك تعامل معاهم سواء في العمل أو غيره ؟ •

 هل بتقدر تكون علاقات اجتماعية بشكل سهل ؟ •

 هل لما بتعمل شىء معين بتكون راضي عنه أو هل انت راضي عن أفعالك بشكل عام ؟ •

 هل عندك قدرة لاتخاذ القرار ؟ •

لو كانت إجابتك على أغلب الأسئلة بالإيجاب , فإنت إنسان واثق من نفسك بشكل جيد و صعب تواجه مشاكل بالنسبة للثقة بالنفس .. إنما ممكن تقابلك مشاكل الضغوط في العمل و غيره و دي ليها طرق علاج

لو كانت أغلب الإجابات أو كلها بالسلب .. يبقى لازم تحاول تعمل إعادة بناء لشخصيتك و لنفسك .. راجع نفسك و طبعاً هيكون في مجهود لازم تبذله في العملية دي ..

خلّي بالك من حاجه مهمة و هي إنك لما تواجه موقف جديد حاول تتفادى إنك تغلط فيه .. حتى لو الموضوع ده جه على حساب المخاطره بحاجه تانية أو موقف تاني بس حاول متغلطش في مواجهة الموقف خصوصاً إنه جديد و ممكن تعمل انطباع سىء ..

حاول تحترم و تقدّر نفسك .. تتخيل نفسك كشخص تعرفه و واثق في نفسه و تخيل هيبقى وضعك إيه

مرّن نفسك على الثقة في كل الأوقات .. مش لما تحتاج تكون واثق في نفسك بس , لأن الثقة لازم تكون عادة بالنسبة ليك .. و كل ما بتحاول تضع نفسك في مواقف جديدة هتشعر بإنك محتاج للثقة بنفسك أكتر

دايماً وضح للناس أفكار إيجابية متبقاش إنسان سلبي .. اتكلم مع الناس بشكل إيجابي

اتوكل على الله دايماً لما تعمل حاجه جديدة و خلي عندك إيمان إنك هتعمل الحاجه دي صح .. و لو لا قدر الله حصل حاجه غلط متفقدش الثقة بنفسك .. لأ .. فكر و شوف ليه اللي حصل ده أو إيه الغلط اللي حصل و سببه و عالجه .. متقفش تتفرج على الموقف و تسيبه .. لو قدرت تعالجه اعمل كده من غير تردد بس تتأكد المره دي إنك هتعالجه بشكل أكيد

هتقدر تحس بثقتك بنفسك لما تشعر إنك مش أقل من أي حد في حياتك و إنك ممكن توصل لهدف كبير و غالي و عظيم جداً و إن مفيش حاجه مستحيلة .. و علشان تحصل على الثقة دي لازم تمرّن نفسك عليها .. مش تقرأ و تسمع و تتكلم و بس .. لازم تعود نفسك , و متنساش ربنا و ادعي دايماً إن ربنا يساعدك .. ربنا دايماً معاك .. ربنا بيقبل التوبة لو غلطت غلطة كبيرة .. و متنساش إن ربنا خلق الناس زي بعضها .. و الواثق في نفسه هو اللي بيظهر و بيكون بارز وسط الآخرين.