بالعربي .. مصري

هابدأ انهارده أكتب شوية عربي .. مع بعض الأحداث اللي حصلتلي انهارده ..

• صحيت زي كل مره و كأني ظابط المنبه على الساعة 12 مش عارف ليه .. و كالعادة بأقوم فاتح التلفزيون على قناة أو تي في و أبدأ أتابع شوية مع برنامج صباحك سكر زيادة .. تقريباً خلاص زي ما بيقولوا ” اتبرمجت” على الساعة 12 .. 

• الكمبيوتر صديقي العزيز .. و تويتر الصديق اللي فين ما رحت متابعه .. فتحت موقع تويتر و بدأت أشوف اللي حصل من قبل ما أنام لحد ما صحيت .. ملقيتش جديد كتير بس انهارده عملت رقم قياسي في الكتابة على تويتر .. كتبت كتير و هو بصراحة موقع يخلي الواحد يكون مدمنه .

• بالعربي مصري أنا مصري و أبويا مصري و كلام نانسي عجرم و الحمد لله مصر جميلة و حلوة دايماً بس اللي ضايقني شوية انهارده ان المياه كانت مقطوعة من حوالي الساعة 1 الظهر للساعة 1 بعد منتصف الليل بالتوقيت المحلي .. هو عتاب صغير على المسئول المحترم .. يا ريت يبقى يبلغنا أول بأول على إذاعة وسط و شرق الدلتا التعليمية علشان ناخد احتياطاتنا .. و عمار يا مصر .

• بدأت انهارده في تصميم غلاف كتيب لمؤتمر في جامعة المنصورة أول يوليو .. بصراحة أنا مليش نفس أبدأ شغل في حاجة .. مش عارف ليه .. انهارده ساعات أحس إني زعلان و ساعات مكتئب و ساعات عادي و ساعات فرحان .. كل الحالات جاتلي تقريباً في آخر تلات ساعات من يوم الأربعاء و أول ساعتين من يوم الخميس .. 

• أول مرة أشوف انهارده فيلم جلادياتور .. بصراحة فيلم عجبني جداً .. بس زعلت إن ماكسيموس مات في النهاية .. أحياناً نهايات الأفلام تخلي الواحد يتضايق و خصوصاً في المسلسلات كمان .. الأجنبي مش العربي لأن المسلسلات العربي لا تستحق معاناة ان الواحد يمسك الريموت و يدور عليهم .. اللهم إلا مسلسل باب الحارة . ربنا يخليلنا سوريا اللي بصراحة أمتعت العرب كلهم بمسلسلات متميزة و لا عزاء للمسلسلات المصرية و عمار يا مصر .