السلطة و الحقوق

اللي بدأت ألاحظه من ساعة ما بدأت في تعلم تصميم المواقع من أكتر من سنتين و بالأخص لأني بدأت أهتم بالمنتديات و تصميمها و لكن مش هاتطرق في الموضوع للجانب التقني .. بس اللي لاحظته اهتمام أي صاحب موقع بامتلاك السلطة على كل شىء حتى لو مش ملكه ..

انهارده واحد بعتلي رسالة خاصة في أحد مواقع الدعم اللي متابعها و كنت صممت ستايل منتدى مفتوح مع كتابة الحقوق كمصمم للستايل .. و هو بعتلي رسالة هانقلها نصياً :

لقد غيرت فى شكل الاستايل وكل شئ وهناك شئ اريد ازالته الحقوق الخاصه بك لانى بعد ايام
هفتح الموقع غير مجانى اذا كنت تمانع فاخبرنى سريعا حتى اغير استايل غيره واركب الصور عليها
ولم افتح الموقع وحقوقك غير موجوده

للأسف الشعب العربي عنده حب شديد للسلطة و امتلاك ما له و ليس له .. أنا مش مهتم كتير بالموضوع الخاص بالستايل و لكن إزالة الحقوق أصبحت ظاهرة عربية بشعة .. و بشعة كلمة قليلة .. لأن أغلب المواقع و المنتديات العربية مبنية على سرقة و حذف لحقوق المبرمج أو المصمم و خير دليل هو 99 % من المنتديات العربية العاملة على نظام vBulletin ..

و للأسف لما أتابع بعض المواقع الأجنبية و ألاقي مشاركات حد عربي باحس بالخجل .. باحس دايماً إننا فاضحين نفسنا قدامنا و قدام غيرنا .. حتى المشاكل منكتفيش انها تكون قدامنا بس .. لدرجة إني كان في تعليق على خبر عربي في موقع Digg إن الخبر بلغة “الجهاد” و المقصود العربية ..

الظاهر إن خلاص .. احترام أي حاجة في البلد دي ضاع و انقرض من زمان .. قول للزمان ارجع يا زمان