تقريباً فات على آخر بوست 6 شهور انتقلت فيها للتدوين عن مواضيع أخرى تقنية متعلقة بموضوع واحد و هو الشبكات الاجتماعية Social Networks . و دلوقتي هارجع مرة تانية للتدوين هنا ..

تجميعات

دي مجموعة مواضيع كتبتها في مدونات تانية في الفترة اللي فاتت :

• Top 6 Secrets
• بالعربي مصري
• السلطة و الحقوق
• Not Learning From Mistakes
• Value Of Time

نصيحة اليوم

احنا في زمن غريب و كلنا شايفين اللي بيحصل حوالينا .. يا ريت نبدأ نصلح نفسنا شوية .. اللي شايف في نفسه حاجة غلط يحاول يصلحها و اللي مزعل حد يصالحه و خصوصاً لو الأب أو الأم .. أنا لا باوعظ و لا باخطب .. بس هيجي يوم تندموا إنكم مصلحتوش حاجة كانت فيكم غلط ..

السلام عليكم ,

عودة بعد غياب طويل و كل عام و أنتم بخير ..

انتقلت اليوم لمدونة جديدة تحمل طابع جديد .. لزيارة المدونة اضغط هنا

سأهتم بشكل أكبر ببعض المواضيع التقنية و لكن ستجدون ما هو مفيد في التدوينات العامة ..

تحديث : انتقلت مرة أخرى لرابط جديدة منذ نهاية شهر مارس تقريباً , أعتذر عن عدم التحديث هنا

www.stylish-solutions.net

السلام عليكم ,

السلام عليكم ,

 طبعاً استنيت انهارده زي ما قالوا نزول العروض الجديدة من شركات تقديم خدمة الإنترنت و فعلاً أهداف حملات انترنت بلا حدود اتحققت و حالياً في جميع الشركات الخدمتين متاحتين للمشتركين الجدد ..

 العرض الأول اشتراك محدد Limited(Volume) Package

و العرض الثاني اشتراك غير محدد Unlimited Package

و الأسعار زي ما هي مفيش تغيير و لا أي حاجة ..

LINK DSL Offers : http://www.linkdsl.com/LinkDSL_Code/Pages/DslAvailabilty/DslOfferNew.aspx

 TE Data Offers :
http://www.tedata.net/ADSL_pricing.htm

الأسعار تقريباً واحدة في الشركتين بالنسبة للإشتراك المحدود و الاختلاف في حجم التنزيل في الشهر ..

 على فكرة الاشتراك المحدد خدمة متاحة من فترة طويلة من بعض الشركات علشان محدش يفتكر إن دي حاجة جديدة ..

أتمنى أشوف اليوم اللي يحصل فيه تطوير بجد لبنية الاتصالات في مصر .. و تحيا مصر يا سيدي..

كل سنةو انتم طيبين .. خلاص رمضان قرّب و يا ريت نستغل فرصة الشهر الكريم بالدعاء و العبادة و يا ريت برضه ده ميكونش في رمضان بس !! .. اللهم بلغنا رمضان ..

و بالمناسبة دي , ده لينك أغنية رمضان جانا لمحمد عبد المطلب .. أنا فعلاً مبحسش برمضان إلا لما أسمع الأغنية دي ..  ( رمضـــــان جـــانا )

وصلني تاج من مدونة العائشة في الأحلام عن التدوين

اسم مدونتك؟

Stylish

لماذا اخترته ..وماهي نيتك من وراء اختياره؟

في البداية كان اسم المدونة مدونة شباب و كان هدفها الاهتمام بمواضيع تخص الشباب بعيداً عن السياسة و التعصب و المواضيع السخيفة اللي بيقولوا انها بتهم الشباب لكن مش كل الشباب بيهتم بمواضيع سخيفة .. التفكير بدأ يتغير و يتحسن و الشباب دلوقتي بقى واجهة مجتمع و مازالت مستمر في هدفي و تغيير الاسم لـ ستايلش كان بهدف إضفاء لمسة تقنية من خلال الكلمة على المدونة و إدخال المجال التقني فيها.

هل فكرت في إغلاق مدونتك؟ والسبب؟

نعم , وصلت للمرحلة دي للأسف بس كان اللي وصلني ليها ظروف عمل و دراسة كانت تمنعني من كده و أحياناً لما يكون الفرد معرض لأزمة صحية أو نفسية أو غيرها بيتوقف عن معظم أنشطته حتى لو التدوين.

صورتك في المدونة ورمزيتها ؟؟

هي صورة من تصميمي مع إنها مش عاجباني بس هي مكتوب فيها اسم المدونة و باحاول اوصل لصورة تانية معبرة أكتر و تعجبني برضه.

لماذا دخلت عالم التدوين من الاساس؟

مجرد تجربة للدخول في موضوع التدوين خصوصاً بعد انتشاره و بقى واجهة جديدة للتواصل و نقل الخبر و المعلومة بعيداً عن سياسات المواقع و الشبكات الاجتماعية.

جمله قيلت لك فى وصف مدونتك؟

صراحة لا أنتبه لأي وصف سىء كان أو جيد قيل عن المدونة.

التعليقات بالنسبه لك ,اهميتها؟

تفاعل و مشاركة و مقياس من مقاييس نجاح التدوينة و أهميتها للمتابع.

احلى بوست كتبته …ضع اللينك , ثم اذكر لماذا؟

أعتبر أن التدوينات الأولى هي الأفضل بالنسبة لي يمكن لأني بذلت جهد في العثور على موادها العلمية و كتابتها بطريقة مبسطة وواضحة.

أفضل بوست قرأته؟ وضع لينكه؟

مقدرش أتذكر تدوينة معينة لأن الواحد بيتابع مدونات كتير بس اللي متذكره لأنه قريب جداً تدوينة في مدونة كريم بعنوان “ من نيت سكيب إلى العنقاء إلى فايرفوكس .. قصة نجاح .. “

أفضل مدونة قرأتها؟

لا أفضل مدونة عن أخرى فالكل يكتب و يعبر و ينجح في ما يكتب فهو مدوّن و هذا هو الأهم.

حد قل أدبه فى التعليق إيه رد فعلك؟

الحمد لله مفيش حد وصل للدرجة دي .

أسوأ مدونة؟ >> أسوأ بوست أسوأ مدون

المدونة التي لا تحدد هدفها الأساسي و لا تنجح في ما يُنشر عليها

هيحصل ايه لإيميلك لما تموت ؟؟

هيندثر تحت التراب , و لكن هو باق شئت أم أبيت حتى أن تعلن جوجل إفلاسها و انتهاء خدماتها و من ضمنها البريد الإلكتروني و معتقدش إن ده هيحصل أساساً مع جوجل .

اديت الباسوورد لحد قبل كده؟ >>كانت إيه طبيعة علاقتك بيه؟

لا .. مع إن في ناس أعرفهم بيدوني الباسوورد بتاعتهم بس أنا مبديهاش لحد.

اسمك ؟

هشام

المشهور بيه وسط اصحابك؟

H الاسم العادي أو اختصار الاسم في أول حرف باللغة الإنجليزية

شخصيتك نوعها إيه؟

حساس لا أميل للعنف متقلب المزاج بشكل كبير سريع الغضب

السفر بالنسبة لك؟

رؤية عالم مختلف و ثقافة مختلفة أتعلم منها و الاستمتاع بطبيعة المكان

وقت فراغك بتعمل فيه إيه؟

مقدرش أحدد وقت فراغ معين بس يا إما بانزل مع أصحابي أو باقضي الوقت في التصفح على الإنترنت أو لو في ماتش للأهلي فلازم أتفرج عليه

المود بتاعك؟

سريع الضغب و الانفعال

الاكلة المفضلة؟

الفراخ و في قول آخر الدجاج

الصفات اللي أخدتها من بابا؟

العصبية و الانفعال السريع و الغضب لكن أستطيع التحكم في نفسي .

الصفات اللي أخدتها من ماما؟

الحساسية و الطيبة.

اكتر ست حاجات بكرهها؟

اشمعنى ستة :

الجهل -

التخلف المجتمعي -

الحكم السريع على الأمور -

النفاق -

أصدقاء السوء –

التدخين -

اكتر ست حاجات بحبها؟

أبي و أمي و عائلتي كلها -

الدراسة المفيدة -

الأطفال -

النادي الأهلي -

العمل التطوعي -

الإنترنت -

الشغل بالنسبة لك؟

العمل الطبيعي و اللي ناوي أكمل فيه إن شاء الله في مجال التصميم و الدعاية , و في جزء من حياتي بدأ ينتمي للعمل التطوعي على المستوى المدني .

الانترنت بالنسبه لك؟

عمل و وسيلة تواصل مهمة و أسلوب أسرع لنقل الخبر و المعلومة بكافة تفاصيلها

أمرر التاج لــ :

 مدونة كريم  , FTM , سالخير

السلام عليكم,

عاجبني جداً إن الموضوع منتشر و مازال مستمر و الحمد لله .. و صوتنا كلنا بيوصل .. انهارده كمان قرأت مقالة في الأهرام عن الموضوع باستفاضة و اتكلمت عن مشاركات المدونين و المواقع اللي عملت الحملة ضد قرار تحديد الإنترنت بس الكاتب بالغ في موضوع السباب و الشتائم الموجهة للمسئولين .. يعني تقريباً كل اللي قرأته في المدونات و المواقع مظهرش فيه سباب أو شتائم و كله كان بيوضح الحقيقة للناس بعيداً عن أي مما ذكر و إن كان فيه سباب أو شتائم فده مش هدفنا .. هدفنا بس هو اللي قلناه من البداية ” إنترنت بلا حدود ” و تحسين الخدمات و إعادة الهيكلة في نظام الاتصالات فائقة السرعة ..

التاج ده من المدونات المشاركة , مدونة قول لا للانترنت المحدود في مصر . التاج ده بيوضح فعلاً حاجات كتير .. و عجبني جداً

ما هو مدى استخدامك للأنترنت ؟؟

متخصص ( مصمم مواقع و جرافيك )

كيف ترى هذى الحملة وما مدى تأثيرها على المستخدمين والمختصين ؟؟

الحملة دي طبعاً بتساهم في التقدم سواء الحضاري أو التكنولوجي .. التكنولوجيا جزء أساسي في الحياة دلوقتي تليفزيون و كمبيوتر و إنترنت و هاي فاي و غيره .. غير إن الحملة دي بتوضح الحقيقة للناس و بتعرفهم و أسلوب متحضر في التعبير عن الرأي مش لازم كل حاجة مظاهرات و شتايم و غيره .. هو حرام لما نكون محترمين و نقول رأينا من غير فضايح في وسائل الإعلام و غيره

ما رأيك بقرار وزير الاتصالات الجديد ؟(هل سيساهم بنشر خدمة الانترنت فى مصر ام هل سيؤدى الى تقلصها ؟؟)

للأسف لو النظام الجديد ده هو الوحيد هيقل عدد المشتركين جداً .. القرار ده بدل ما ينمي انتشار الإنترنت و يزوده للأسف بيقلله من ناحية الاشتراكات مع الشركات و بيزوده من ناحية الوصلات اللي المسئولين فاكرين إن كده هيقضي على الوصلات .. كده الواحد يجيب خط 2 ميجا مادام غير محدود بسعة تنزيل أو عدد ساعات و أوزع بقى على شارعنا كله ب 30 جنيه في الشهر و أكسب أكتر من اللي هدفعه في الاشتراك (760 جنيه) ..

ما هى اسباب الوزير المعلنة والغير معلنة فى رأيك ؟؟؟؟

صعبة الإجابة بصراحة لكن المعلنة اللي بيقولها إضافة شريحة جديدة من الناس لمستخدمي الإنترنت و القضاء على الوصلات .. لكن الغير معلنة حسب اعتقادي ممكن يكون جزء منها سياسي و الآخر مكاسب مادية كبيرة طبعاً لشركات تقديم الخدمة و طبعاً جزء منها بيدخل جهاز الاتصالات و الوزارة ..

من هم المستهدفون بهذا القرار ؟

ممكن المدونون السياسيون يكونوا من أهداف القرار بمحاولة الحد من انتشار تدويناتهم المضادة للحكومة و قراراتها .. و للأسف كل الناس مدونين و غيرهم هيتأثر .

هل تهدف الحكومة من هكذا قرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟)

أكيد تحديد استخدام الانترنت هو فرض وصاية على الناس ..

كيف ستتراجع الحكومة عن قرارها ؟

باستغلال كل حاجة .. الحملات الوطنية ضد القرار و الجمعيات و المنظمات العالمية للحريات .. حتى لو وصلت لحد مقاطعة استخدام الانترنت.

كيف تصف هذا الحدث ؟؟

استغلال و سلطة على الشعب و حد من الحريات و الديمقراطية

هل يستحق وزير الاتصالات الائتمان على أمن مصر المعلوماتى وصناعة التكنولوجيا بمصر؟؟؟

لكل جواد كبوة

ماذا تتوقع من تفاعل هذى الحملة عالميا وعربيا ومحليا ؟؟؟؟

التفاعل الحمد لله منتشر محلياً و عربياً و أعتقد وصوله عالمياً بشكل مكثف إن شاء الله

هل أثبتت وزارة الاتصالات والمعلومات فى مصر جهلها العملى والمعلوماتى و سوء تقديرها للظروف المحلية والدوليه … واستغلالها للوضع المحلى ؟؟؟

بالتأكيد إذا كانت شركات مقدمة الخدمة أقنعت المسئولين إن استخدام الخط الواحد أقل من 2 جيجا شهرياً ..

ده الـ 2 جيجا دول على خط 256 كيلوبايت يخلصوا في أسبوع بالكتير (طبعاً ده حسب الإستخدام)

ما هو الحل فى رأيك ؟؟

الحملة ضد القرار ثم مقاطعة الخدمات

هل ترى ان نجاح الحملة يتمثل فى

التراجع عن القرار و إعادة هيكلة نظام الانترنت فائق السرعة في مصر بشكل كامل و تطويره

ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟

مناورة للحجر على العقول والافكار و تقسيم الشعب اللى طبقات تحت بند الاختيارية

هامرر التاج لــ :

FTM

مدونة كريم

مدونة اتكلّم

اللي ميعرفش يعرف .. و اللي عرف يعّرف غيره

تخفيض أسعار الانترنت فائق السرعة 50% .. للوهلة الأولى يعجبك الخبر و تقول الحمدلله بس ادخل و اقرأ الخبر بقى

وحدد مجلس إدارة الجهاز طاقة التنزيل بطاقة تحميل 2 جيجا شهريا أو تحديد عدد ساعات الربط حسب طلب المشترك ، وعند طلب المشترك طاقة تنزيل أو ساعات ربط إضافية يتم سداد المقابل الشهري الإضافي.

 

و كتير مننا قرأ الخبر ده و استنكر الموضوع .. لكن اللي معجبنيش خروج السيد المسئول في اليوم التاني و يقول إن النظام ده مبيحددش عدد ساعات الاستخدام و انك ممكن تفضل مشغل الخط للوقت اللي انت عايزه .. طيب يا سيادة المسئول ماهو ده مخصوم من استخدامي لطاقة التحميل أو بالأحرى (التنزيل) اللي انا اخدتها .. غير كده إن 2 جيجا شهرياً أو 60 ساعة بقيمة 45 جنيه أغلى من اشتراك غير محدود بنفس السرعة و بـ 95 جنيه ..

يا سيادة المسئول إنت بدل ما بتحاول تقلل من الوصلات غير المشروعة بتزودها أكتر و أكتر و النظام أثبت فشله قبل كده لما كانت إحدى الشركات طبقته و حتى في الدول الأخرى النظام غير مستخدم بل بتوصل السرعة أضعاف أضعاف أكبر سرعة إنترنت في مصر و هي 3.5 ميجا ..

أعتقد إن السيد المسئول لازم ياخد في باله إنه بيكلم ناس ربنا رزقها بعقل تفكر بيه و إنه مش بيكلم واحد قاعد على شط الترعة و بياكل قصب .. انت بتكلم مستخدم واعي عارف إن ده تقييد لحق الاستخدام و حرية التنزيل للمستخدم .. كل مستخدم حر في إنه ينزل اللي هو عايزه بدون قيود اللي عايز أفلام , أغاني , برامج .. كل واحد حر.. أي نعم الانترنت مش أفلام و أغاني و بس لا عندك حق فيه كم معلومات لا حصر لها .. لكن المستخدم حر في كيفية استخدام الخط الخاص بيه ..

أقل السرعات اللي ممكن تشوفها في أوروبا مثلاً 8 ميجا/ثانية و طبعاً بأسعار زهيدة ممكن توصل لـ 50 يورو شهرياً .. أعتقد إن لو الهيئة المسئولة اهتمت بتطوير و زيادة السرعات و في نفس الوقت تكون الجودة أحسن و بأسعار مناسبة للمستخدم أحسن ما تحاول تطبق نظام (فاشل) .. النظام هيتم تطبيقه من أول سبتمبر و يا خبر انهارده بفلوس بكره يبقى ببلاش ..

في بعض المواقع ظهرت بتتكلم عن الموضوع ده و بتعمل حملة كبيرة سواء بين المستخدمين أو لإيصال المشكلة لوسائل الإعلام و توقيع عريضة ضد النظام الجديد في تحديد استهلاك المستخدم للإنترنت اللي يقال عليه “فائق السرعة” ده لو كان كده فعلاً.

www.mesh-gayeb.com

www.netegypt.ch

http://msh-ana.blogspot.com/2007/07/blog-post_22.html

السلام عليكم ,

باعتذر جداً للي زاروا المدونة و مكانش فيها أي جديد .. بس الواحد خلص امتحانات و بعد كده انشغل في حاجات كتير و ورش عمل و تدريب و كده بس الحمد لله الواحد رجع تاني ..

الواحد لسه راجع من اسكندرية و بصراحة الجو هناك روعة .. الواحد كان نفسه يفضل هناك لفترة أطول بس الظروف مسمحتش بس إن شاء الله الواحد يقدر يرجع هناك قريب ..

في البداية أحب أكتب عن نتيجة التاج اللي وصلني من محمد عبد الشكور صاحب مدونة اتكلّم عن إدمان التدوين و دي كانت النتيجة

التدوين عندي 64 % .. متهيألي نسبة معقولة جداً بالنسبة ليا .. بس يا ترى هل هتكون ثابتة و لا ممكن تزيد أو تنقص .. العلم عند الله .. لإجراء الاختبار .. اضغط هنا

الموقع اللي عامل الاختبار ده عليه مجموعات اختبارات جميلة جداً سواء كانت تقنية زي اختبار معرفة أكواد إتش تي إم إل خلال 5 دقائق .. أو اختبارات عامة زي معلوماتك عن الأفلام او اختبار القهوة و غيره .. بصراحة مجموعة الاختبارات دي عجبتني جداً و ممكن أي حد يجربها

إن شاء الله في انتظار الوصول للفكرة للتدوين عنها قريباً

في النهاية أمرر تاج اختبار التدوين لــ :

MMS911

العائشة في الأحلام

سالخير

Posted By : Stylish

أنا كنت بدأت من تقريباً 6 شهور تقريباً بعد شهر رمضان اللي فات .. بدأت أكتب مقالات في الويكيبيديا بس بعد كده جت ظروف الدراسة تاني و الشغل فالواحد بعد عن الكتابة هناك .. بس تدوينة “ويكيبيديا العربية 30,000 مقالة , ادعمها !” في مدونة اتكلّم شجعتني إني أرجع و أكتب فيها تاني ..عدد المقالات في اللحظة اللي باكتب فيها السطر ده 30.709 مقال و مازالت في تزايد .. بجد للي ميعرفش الموسوعة العربية لازم يشوفها دلوقتي و يتصفحها .. بجد فيها معلومات كتير ممكن معلومات متكنش عارفها قبل كده .. معلومات في كل حاجه .. عامة .. سياسية .. رياضية .. علمية .. اقتصادية .. جغرافية و تاريخية .. و الشخصيات المهمة في التاريخ .. المدينة أو القرية اللي انت عايش فيها حتى ..

أنا باضم صوتي لصوت الأخ محمد في مدونة اتكلّم و أتمنى إن كل المدونين العرب يشاركوا بكتابة المقالات في الموسوعة .. طبعاً هي مقالات عامة معلومات بتكتبها و الناس تعرفها .. لو كتبت كل يوم مقال واحد .. انت و غيرك و غيرك .. شوف ممكن توصل الموسوعة لكام مقالة ..

في السريع كده بقى التاج اللي مررهولي تاموراي :

أحب شخص لقلبك في الدنيا؟
والدتي و والدي ربنا يخليهم

انسان مستعد تضحي بحياتك – ركز فى كلمة حياتك – عشانه؟
والدتي و والدي ربنا يخليهم

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
ممم .. متهيألي لسه موصلتش لدرجة الكره دي الحمد لله

ما هو اسم اجمل كتاب كتبه بشر قراته ومحتفظ به حتي الان؟
بصراحة أنا حبيت قصة الأيام لطه حسين

اسم كتاب كتبه بشر برضة- انت متعلق بيه وبتقرأه كل فترة؟
متهيألي نفس الإجابة برضه قصة الأيام و لو إني قليل لما أرجع لقراءة كتاب بس عملتها مع قصة الأيام

اهم جهاز منزلى انت متعلق بيه او بتستخدمه كتير؟
أكيد الكمبيوتر شىء أساسي لازم أستخدمه

مكان تحس بالراحة عندما تدخله؟
المسجد و بيتنا

شىء تحس بالراحة النفسية عندما تنظر اليه؟
البحر و النجوم

مكان تحس فيه بالحنين الى شىء لا تدرى ماهو و ذكريات جارفة الى لاشىء؟ إسكندرية .. بالنسبة ليا لما باروحها بافتكر فيها ذكريات قديمة مع إني متولدتش في إسكندرية

اجمل مدينة زرتها داخل مصر ؟
الإسكندرية برضه .. من أجمل المدن اللي زرتها في حياتي

أجمل مكان طبيعي رأيته داخل مصر ؟
غروب الشمس في الإسكندرية

شخصية كارتونية بتحبه؟
توم و جيري .. أساسي قبل ما أنام

نوع هاتفك المحمول؟
حالياً نوكيا 6630 .. بس ناوي أنقل لـموتورولا

سرعة بروسيسور جهازك؟
بروسيسور 3.1 جيجا 2 ميجا كاش (إنتل)

حجم ذاكرة –هارد- جهازك؟
ذاكرة 256 – هارد 120 (هارد 80 + هارد 30) – طبعاً للأسف شغال ويندوز إكس بي .. و بافكر في اللينكس حالياً

المساحة التى تشغلها المواد الاسلامية على جهازك ؟
2.78 جيجا

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟ - *****

أهم هدف انت واضعه لحياتك الآن؟
أولاً أنهي دراستي بنجاح -
ثانياً أكمل بنجاح مسيرة شغلي العادي كان أم التطوعي -
ثالثاً أحاول أغير سلبيات في حياتنا -

مواصفات فتاة الأحلام بالنسبة لك؟
الذكاء .. أحب تكون فاهماني , عارفه ربنا , الاحترام , يكون عقلها متفتح و تعرف واجباتها كويس في الحياة

صف ما يأتى:شعورك لما بتسمع كلمة مصر ؟

بازعل على حالة مصر و بافتكر تاريخ مصر اللي فات و راح

شعورك لما بتسمع كلام عن اليهود؟
بصراحة من كتر اللي بقى اليهود بيعملوه ..لم يعد لدي شعور

شعورك لما بتشوف ظابط شرطة؟

بأتمنى يكون بالصورة اللي المفروض يكون فيها و يقوم بالدور اللي المفروض يعمله من غير استغلال لسلطته

شعورك لما بتشوف الكناس العجوز فى الطريق؟
الدعاء , و إن ربنا يرزقه و يعيشه عيشة كويسة

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
عادي مفيش حاجه معينة .. مواطن يمكن ملتزم بدينه و يمكن هو فاكر إن الإسلام هو الشكل اللي عامله كده بس

احساس يراودك فى اشارة مرور مغلقة بسبب مسئول كبير؟
ولو إنها محصلتليش بس مش هاقول غير جملة واحدة .. حسبي الله و نعم الوكيل

أمرر التاج بقى لحد تاني:

متشرد في بلاد العجائب

العائشه في الأحلام

سالخير

 Posted By : Stylish

باكمل برضه موضوع سلوكيات المجتمع اللي بنشوفها دايماً, و خطر في بالي دلوقتي معاملة المجتمع لأفراده.. لكن مش الأفراد العاديين .. أقصد الأفراد اللي ربنا ابتلاهم بشىء ما .. إما مرض مزمن او حالة نفسية أو عيب خلقي ..